Mangalompa Sandiri

Pagi pagi sogot hian dang mullop dope mataniari di Purba nga pintor nangkok au tu lantai dua mandungoi si dolidoli on. Antar hu songgak ma antong.

“Hei bangun kau dulu” hupastaphon ihur na i nanget. 

“Jam segini kok ngga bangun!, mana kunci motor…, papa mau ke pasar dulu…, jangan lupa matikan semua lampu-lampu…” ningon ma i. 

“Ayo… turun dulu…. Buka dulu gerbangnya” sambil turun diihuthon sidolidoli on ma iba tu toru. 

Nistarter ma motor on da (molo dihuta nami kareta ma goar ni motor on).

“Rurrrrrr….rurrrr….” ninna motor on ma sambil mardalan arah tu pasar an.

Tarbereng ma indikator ni bensin hape nga rest. Memang songon on ma dolidoli saonari songon na so adong do perencanaan di ngoluna. Hape molo iba nga tor nisiaphon songon bensin on tetap tersedia di tangki, asa molo songgot nihaporluhon pintor siap pakke ma nian, dungi asa unang diordior mangalului par-bensin ketengan sogot niari songon on.

Dung di pasar on pintor ni luluan ma antong na lengkap tigatigana asa unang maos.

“Ayamnya satu ekor pak…. Dibului ya… ngga usah dipotongpotong, nanti aja aku potong sendiri” ningon ma tu amanta parmanuk on.

“Pak..! ditinggal dulu ya… mau beli yang lain dulu.” Dungi laho ma iba tu parkalapa:

“Bang… parutkan kelapanya satu ya…. Pilih aja yang banyak santannya. Airnya mau aku bawa juga.” Maksudna asa aek ni kalapa on baenon untuk Santan Kental ma didok goarna.

Ala ingkon paintehon do parmanuk dohot parkalapa on, laos ni dioran ma muse parbumbu dohot angka lan na asing na porlu tu lompalompa ni iba annon.

“Buk…kasi kentangnya, trus daun sup-nya”

“Ini aja untuk Sopnya pak” ninna inanta on jala dilehon ma sada palastik, nga disi adong daun sup, daun bawang, kol, so binoto manang aha ma i, alai otikotik ma i di sappur dibagasan palastik i.

“Buk… aku mau masak gule ayam, kasi dulu untuk ukuran satu ekor ayam ya…”

Ai dang songon sinajolo be sonari on, nga tersedia be sude di pasar an. Ianggo na jolo ingkon pulikpulik do tuhoron songon halas, sanggesangge, hunik, bawang merah, bawang putih, ketumbar, dohot lan na asing. Nga tersedia be sude disi naung margiling, tinggal paboahon na ma tu inanta partigatiga i untuk porsi songon dia do situhoron.

“Pak… ayam apa pak?” ninna inanta on manungkun.

“Boasa disungku inanta on” ninna roha, ai na masa do saonari on adong manuk na so marimbulu, ninna roha ma i. Alai asa diboto do ra ukkuran ni bumbu on.

“Ya ayam jambe lah… jambe mira sihaltong” ningon do tu inanta i, alai songon na dipanotnoti do bohi ni iba;

“ai na so diantusi do?” Ninna roha, laos niulahan ma mandok,

“ayam jago buk…” Laos dilean ma bumbu on jala nipangido ma dua tolu lembar bulung unte pangir, asa angur.

Ueee…. on ma tahe molo ditinggalhon inanta pardihaus iba. Tarhona do laho ibana dohotdohot mudik tu Bonapasogit. Ianggo huta ni halak ion jonok do marnimbanghon huta ni iba di Utara an. Dungi tarborot ma ibana naeng mulak ala soadong ticket. Molo adong pe ticket i dang binoto be argana, nga boi untuk mangan keluarga satonga bulan i!.

Alai tahe, i do bangko ni na maradat on. Na ingkon do marsaor iba di paradatan, apalagi apala boru ni abang saompu muse do na muli on. Kebetulan libur “Minal aidin walfa’idzin’ do saonari, asal ma adong perwakilan, alana molo duatni do na mulak dang binoto be pengeluaran, olo na ma godang tagihan kriditkart annon.

Apalagi ma iba baoa on, na mulak ma goar na tu Bona pasogit, manigor dianggap parhuta an do iba sigobang hepeng. Dirimpu halak an do songon na mamutiki bulungbulung na marurus i hepeng i, hape so adong sikorupsion, boha ma na mangais martuduk do tong di parngoluan on.

Sipata nigogotan do mangalului sihumisik i, maol do dapot ala naung dialtupi angka koruptor on, gabe dang adong be nanggo na peut i pe tahe nga suda be.

Nilompahon ma jo da na tinuhor on. Nga nibayanghon gule songon na di Silindung an. Didok halak antar asing do ninna lompalompa ni par Silindung. Molo gule, adong do dibaen ombu-ombuna, i ma kalapa na nisaok (molo dison digongseng manang disangrai do didok).

Dungi dung nisaok saparopat kalapa on, niblender ma asa halus, ai molo so halus gabe sungkotsungkot do annon di aruaru. Niporo ma santan kental parjolo pakke aek ni kalapa i asa manis. Niiris do bawang asa angur manumis bumbu sinangkinon.

Dung sidung nipersiaphon angka bumbu na i, mulai ma paturehonon manuk mira sihaltong nangkinon. Nitutung ma jo angka imbulu halus na i jala asa antar hojal, angur, marmiak do manuk i, ba gampang ma annon bolaon mambaen tanggotanggoanna.

Bolon-bolon ma baenon tanggotanggo na i, asa pintor puas annon dua sidolidoli botang na di jabu on mangaltuphon jagal manuk i. Ai na piga ari on, na nituhor na ma ingkau sian luar an, sian Warung Padang an, ipe gelleng-gelleng do tanggona, dang sukkup santanggo sahalak, apalagi daina pe hurang do tabona ala manuk sioto do dibaen.

Dung nitanggoan manuk mira sialtong on, dua ma tahatahana, sada ihurna, sada tanggurungna, dua haehae dohot dua habongna. Himpalma rungkung dohot uluna, ba tambana ima bilalang dohot ateatena.

Nipressto ma jo jagal manuk on asa dauk jala boi hatop lompaon annon. Menurut petunjuk pressto on malo tu jagal babi boi do dauk 20 minut, molo manuk 25 minut, molo jagal horbo 35 minut. Molo dihitaan najolo tu hudon tano do dilompa asa dauk, dibaen ma dukkapdukkap tu langkop nai jala diambehon ma batu tu langkop na i asa borat. Jadi nga adong pressto na jolo di hitaan.

Nga siap be sude. Nisiaphon ma panggorengan tu bawang naung niiris nangkin. Unang sanga mosok bawang i, sukkup do hunik warnana jala angur, ba nipamasukma bumbu na nituhor sian pasar nangkin. Niosengoseng ma i jala pamasukon ma bulung ni unte pangir.

Dung masak bumbu na i, pamasukon ma santan encer parjolo, diadukaduk merata jala pamasukon ma jagal manuk na nipressto nangkin. Ingkon sirnip do santan i tu jagal i. Nipamasukma muse sira dos tu dai na somal jala baenon sasachet  bumbu masako.

Dipasombu ma jo jagal i masak sampe meresap angka bumbu na i. Unang pittor dipamasuk kantang asa unang gabe malala annon. Dung gurgur masakan i hirahira 15 minut, pamasukon ma kantang na i jala dipainte 10 minut nari asa moru jo satonga aek huahuana i.

Dung tinggal satonga hua na i rap pamasukon ma ombuombu kalapa i dohot santan kental. Dung masuk santan kental dang boi be tinggalhonon, ianggo na jolo ditingki mangurupi inong mangalompa sisongon on didok do boi habang santan i, ingkon niaduk aduk na ma hua na i sahat tu na mago gumogumo na adong dihua na i, i ma tanda naung masak lompaan i. Unang lupa mandai sira asa pas tu pandaian.

Nga be, baen ma angka pinggan panganan i;

‘Siapkan meja makan ya amang…. Supaya makan kita” Ningon ma tu sidolidoli paidua on.

Tabo ma antong na mangan dohot indahan na las, las do pe gule Tarutung on, las muse do tes i, gabe las ma roha. Sombu sihol na so dohot iba mudik tu bonapasogit.

Repot ma tahe na dipasombu ni inanta on iba, alai ala las ni roha ni iba, ba ingkon do nian diboto angka dongan. Nisurathon ma on pengalaman na mangalompa on asa diboto angka dongan na manjaha dison. Memang lancar do manurathon on ala diiringi lagu lagu na jolo sian Anneke Gronloh. Ba tombus ma tahe Program Manunggal on… (mph 5 Sep 2011)

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: