PROFIL POPULER : Pdt. Jetro Hutauruk

Pdt. Jetro Hutauruk

Sejarah Pdt. Jetro Hutauruk

Oleh: St. H. Hutauruk (Ompu Mindo) (31-08-1915 s/d 02-12-1991) /Br. Panggabean (†)

I. PARTUBUNA

Onom halak amanta Pdt. Jetro Hutauruk on na marhahamaranggi, anak ni amana O. SALISI RAJA MUSA HUTAURUK, i ma :

  1. Raja Johanis (Na umpompar A. Hutauruk, S.H. Hakim)
  2. Raja Isak (Na umpompar Pdt. Eddy Oloan Hutauruk)
  3. Raja Maximilian (Na umpompar Drs. Jonggi Hutauruk)
  4. Raja Josua (Na umpompar KK. Binsar Hutauruk)
  5. Raja Josafat (Na umpompar Marulam Hutauruk S.H.)
  6. Pdt. Jetro Hutauruk (Na umpompar panurat on)

Amanta na onom  on naung tardidi gabe halak Kristen, ni-Didihon ni Pdt. AUGUS MOHRI di Huria Lumbansoit.

Amanta on tubu di ari 8 Januari 1881. Na “Tading di tabutabu” do amanta on lobi hurang tolu bulan dope di “hiringan manuk” manang “bortian” ni inana Kornelia br.Siburian di na monding amana Ompu Salisi di taon 1880 umur 59 taon. Asa ndang ditanda amana. Jadi inana Kornelia br. Siburian on nama na pagodang-godang amanta on, niurupan ni angka hahana sahat tu napasingkolahon, ro di na pangolihonsa. Lobi hurang 30 taon inana Kornelia br. Siburian patureturehon amanta on. Ai di ari 10 Agustus 1910 marujung ngolu ni inana i. 

II. MARHASOHOTAN

Di taon 1905 do marhasohotan amanta on dohot inanta MARSALINA br. Lumbantobing, boru ni Raja Ihutan Ompu Raja Isak Lumbantobing sian Pagarbatu, i ma di na marumur amanta on 24 taon.

Ringkot sinurathon dison barita pangariritonna : Di sada ari taon 1905, dipaborhat inana, amanta on mangalului Boru gabe Ina Soripadana. Mardalan pat do ibana mandalani dalan na langlang (sepi) manangkohi tor (bukit) dompak Pagarbatu. Di dalan na langlang i maradian ibana. Disi ma ibana martangiang; Songon on ma didok ditangiangna : “Ale Debatangku, Debata ni damang Raja Musa, Ho ma na patuduhon di ahu sada ina na burju, na malo mansonduk jala na lambok roha. Ina na boi sauduran rap dohot ahu di tohonanhu songon guru sipararat Barita na Uli. Ia disi ahu ditinggang udan na por, disi ma patuduhon tu ahu ina songon na hupangido i tu Ho Amang Debatangku…” Amen. Toho di na mamolus amanta on di sada huta di Pagarbatu; Tompu ma ro habahaba dohot udan na por situtu gabe malitap (basah kuyub) ma paheanna, alai soara na jou-jou sian sada bagas mandok “Eee… amang beasa sai taononmu udan i, ai ise do ho, ro ho tu jabu on manisio…”

Humusor ma ibana jala dibereng sada ama jongjong di emper ni jabu i huhut didapothon jala nangkok ma ibana tu emper. Disungkun ma amanta on manang ise, jala aha ni ulana dompak huta i.

Mardongan serep ni roha amanta on mangalusi, dipaboa ma tangkas sangkapna rodi tangiangna na mangido udan na por i. Dipaboa huhut manang anak ni ise ibana. “Alealeku do amangmu Ompu Salisi…”ninna raja ima huhut  dijou ma boruna, laos  disuru mambuat pahean mangganti pahean ni amanta on.

Dung tipak marpahean amanta on, dipaboa ma manang ise ibana (raja i), ima tu  Raja Ihutan di Pagarbatu. Tarsonggot do amanta on, ai diboto na sangap do hape parjabu natinopotna i. Diantusi raja i do namasa i, gabe ditogihon raja i ma amanta on tu bilut tonga, jala rap hundul disi. Didok raja i ma tu amanta on : “Antong, naung dipatongon Debata do ho bahen helangku”. Ndang bea husuru borungku, ala torop do suruanhu di bagas on, Hape sopamotanhu gabe boruku hujou mangganti paheanmu. Ahu pe nunga porsea, tung alus ni Tangiangmu do na patongonhon ho tu jabu on. Laos dihobasi boruna Marsalina Br. Lumbantobing ma sipanganon di nasida, rap mangan ma nasida jala laos marborngin do amanta on di jabu ni raja i. Ndang sadia leleng nari dipasaut Debata ma parsaripeonnasida.

Sinurathon pe barita pangaririton ni amanta on, na gabe jamita do i dibahen paboa na so ulaon ni jolma na padomu anak dohot boru gabe sada ripe (Joro manang huria na metmet di Tuhanta).

Tung sintong do antong dapot amanta on pangidoanna sian Tuhanta. Ai dung saut Inanta on gabe ina soripadana, tung pangurupi do diulaon ha-guruonna, lumobi pangulaonna di Huria ni Tuhanta. (Haguruon najolo di sikola, laos guru do di Huria marjamita huhut songon Evangelis mandalani huta-huta manogunogu angka sipelebegu asa gabe halak Kristen). Lobi sataon amanta/inanta on songon “SITOTAS NAMBUR” pararat Barita na Uli tu luat sipelebegu i ma di Sijarango, Sihorbo Tanjung, Tukka Boven Barus, Lumban Hariara, dna. Sudena inganan i dihaliangi tombak longolongo (hutan besar).

Tu luat ni sipelebegu na di tombak i ma diboan inanta on, marratus kilometer mardalan pat sian Sipoholon alai ndang manjua inanta on, nang pe so hea ditaon songon i saleleng dijolo ni Raja Ihutan Pagarbatu, holan na mangatur ulaon ni “pangurupi”  i do diula.

Jotjot do dihatahon inanta on angka na hansit natinaonna di angka luat na dao i, na ingkon dalanan pat huhut mandasdas pangisi luat i marpadot mangula tanona, laos ihut mardongan jamita sian Hata ni Debata.

Sai gabe jamita do dibahen amanta Pdt. Jetro Hutauruk on nang tu angka anakkonna (termasuk tu panurat on) habengeton, hapadoton, haserepon, dohot halambohon ni rohani Inanta on, lumobi hapantunon ni rohana maradophon manag ise na ro tu jabuna, na lea manang na pogos, nang namora, dos do dibahen panjanghonna. 

III. PANGULAONNA

Lobi hurang 34 taon ma amanta on mangula di Harajaon ni Debata di Huria  sian mulai haguruonna sahat tu ha-Panditaonna (1903 – 1937). Ndang pola sinurathon dibarita on angka Huria, inganan pangulaonna. Na ringkot sinurat dison parbue ni pangulaonna i  ma :

Parjolo : PARTANGIANGON. Apala ulaon Partangiangon on ma na sai dihapusuhon (diharonsothon). Adong partangiangon “hapunjunganna”, partangiangon paduadua dohot Inanta, partangiangon rap dohot anakkonna, partangiangon napinatupana di huta-huta, di Gareja.

Ndang hea amanta on borhat tu angka huria pagaran dohot tumopot huta-huta, ia so jolo rap martangiang dohot Inanta, songon napinodahonna nang tu anakkonna : “Martua do sada ama na tinangiangkon ni Ina soripadana molo borhat ama i tu ulaonna, martua do sada Ina Soripada, na sai ditangiangkon ama tuandolina, asa diramoti Debata ina i na tininggalhonna di jabuna”.

Paduahon: HOLONG. Ndang holan na marjamita amanta on molo laho tu angka huta-huta manopot ruas ni Huria. Alai diulahon do pangubation tu angka ruas na marsahit. Diboan do angka ragam ni  ubat na niramuna  hian sian jabu sian angka duhut-duhut na marragam. Angka duhut-duhut i ma dipulung gabe ubat mardongan miak pandampol. Ndang mardia imbar diubati, dakdanak nang na magodang. Dohonon tung sude do malum naniubatanna. Loja situtu do amanta on, ai ganup ari sai adong do na ro tu jabu, halak na mamboan na marsahit na. Tung dihasubangkon do manjalo hamaulitaeon sian angka na marsahit i. Loja do nang inanta, termasuk panurat on mangalului ramba/duhut-duhut na gabe ramuan ni ubat sipulungonna.

Laos di tingki pangubationna i do amanta on mamodai huhut manjamitai angka na losok mar-Minggu, mamaritahon Barita na Uli ni Tuhanta Jesus Kristus. Tung marparbue do pangulaonna i, ai sai torop ma na ro tu angka punguan-punguan Partangiangan di hutahuta, nang tu parmingguan di Gareja.

Patoluhon: PARSAORANNA:

a.   Maradophon angka ruas ni Huria. Manang Huria dia tininggalhon ni amanta/inanta on, di na bungkas tu huria na asing, tung sude do tumatangis ala holong ni rohanabe dohot marningot denggan ni pangulaonna dohot marningot halambohon ni inanta on.

b.    Maradophon haha-anggina. Diingot amanta on do sude pardangolanna na “tading di tabutabu” i. Ai tu sude hahana baoa  dohot hahana boru, sai hata amang, inang do didok. Na tangkas diingot panurat on, i ma amanta no. 4 Raja Josua (haha ni amanta on) na sai ro uju i tu Tampahan uju Pandita amanta on di si. Ndang hea didok “hahang” alai sai “amang” do didok. Songon i tu hahana boru, i ma hahana Boru Nababan, soripada ni hahana Raja Maximilian, dohot tu hahana Boru Parapat, soripada ni hahana St. Josafat, sai inang do didok.

Molo adong na masa parsalisian di huta di pinompar ni Ompu Salisi Raja Musa, pintor dihapogani do laho paturehon mardongan jamita dohot elehelek, asa anggiat boi mardame, marsada, masihaholongan, masiurupan, masitungkol-tungkolan, lumobi asa masitangiangan. Sipata rap ro ma amanta dohot Inanta tu huta paturehon, huhut dipatupa sipanganon.

Marparbue do denggan ni parsaoranna sahat tu angka anakna/ boruna tubu ni hahana na lima na di huta. Ai sahat  tu sundut ni angka anakkonna, tongtong do marsada, ndang hea tubu parsalisian.

c.    Maradophon anakkonna.

Laos i do dipodahon tu sude anakkonna na 12 i, ualu (8) anak dohot opat (4) boru. Asa denggan marparsaoran nang masiurupan huhut masitangiangan dibagasan holong parhaha-maranggion/paribotoon mardongan haserepon, hatoruhon ni roha. Apala lumobi marlambok ni roha songon Jamita ni Tuhan Jesus di Mateus 5,5 i. “Naeng marojahan tusi ma hamu sude anakkonnami.” ninna amanta i di tingki dipapungu martangiang bodarina dung sidung mangan. Songon na jotjot didok : “Jolma na pogos do hita, ndang adong arta/sinamot, hauma, dorbia, hepeng dna. tinggalhononku di hamu anakkonnami. Alai adong do na ummarga sian i hupodahon tu hamu. Hasadaonmuna do muse hamoraonmuna, naso tupa hurangan di manang aha asal dipeop hamu. Alai naeng ingkon RAP PORSEA do hamu di Tuhanta Jesus naung manesa dosanta na godang i…”.

Marparbue do poda dohot sipaingot ni amanta/inanta on di sude anakkonna, ai so hea adong masa parsalisian, tongtong marsada jala masiurupan, masihaholongan sahat ro di sadari on, Pogos pe di arta pinompar ni amanta/inanta on, alai di sude angka ulaon haroan Pesta dohot na mardomu tusi, sai tulus do denggan mardongan Pasupasu sian Tuhanta Parasi Roha i.

Nang di saleleng ngolu ni Inanta dung ditinggalhon amanta nahinan leleng ni 37 taon; Sai hot do poda hasadaon i dipodahon tu sude anakkonna. 

IV. RAGAM NO NA MASA DI NA LAM MATUA: 

a.   Marhobas manadingkon portibion:

Mangihuthon boaboa na sai pinarate-atehon ni inanta nahinan M. br. Lumbantobing; Mulai sian taon 1936 nunga “asing-asing”  pangalaho ni amanta on. Nunga dipadao rohana sian portibion, sai holan Surgo na di Banuaginjang i do dihatahon. Molo ditaringoti inanta angka sisarihonon na di parsikolaan ni anakkonna, sipata ala ndang adong be hepeng sitongosonna tu anakkonna na marsikola di luat na dao (Jawa), aha didok amanta on : “Unang holsoan dainang, tapaima ma harorona sian Tuhanta, tongosonna do i”.

Sintong do ditongos Tuhanta, ai di na laho ganup manogot Inanta nahinan (pkl. 5 manogot) mardalan pat tu Soposurung Balige manggadis sayur-sayuran sian porlakna, hatop-hatop do laku. Hira gumodang do pandapotan ni inanta nahinan sian tuhor ni saryur-sayuran sian balanjo ni amanta nahinan jala sai dipapungu-pungu inanta nahinan do i so sian pamotoan ni amanta nahinan. Molo dung hagogotan amanta nahinan di hepeng sitongosonna, i pe asa dibungka inanta on purona, ai tung na hemat situtu do inanta nahinan nang marsidabuan.

Di hatiha pangalaho ni amanta naung asing sian na somal; Di sada bodari ma didok tu inanta nahinan songon on: “Anggo ahu Inang, tibu nama borhat sian tano on ai nunga huida haulion ni huta na imbaru i di Surgo i, anggo ho Inang, leleng  do ho mangolu di tano on, unang pola holsoan di ngolu ni anakkonta i, sai surdukhonon ni Tuhanta na mora i do tanganNa mangurupi ho. Sonang do ho muse bahenon ni anakkonta i. Nang anakta si Mangara Saur Oloan, ingkon ro do i muse dung borhat ahu sian tano on, jala patupaonna do las ni roham.

b.   Las do rohana dung marpahompu sian anakna

Di  jolo ni amanta/inanta nahinan do sorang pahompuna parjolo sian anakna (panurat on) di godung Tampahan. Laos amanta on do mambahen goarna TUNGGUL, tinambaan ni parumaenna br. Panggabean : MANGAPUL, laos amanta on mandidihon di ari 17 Mei 1936 di Gareja Tampahan. Adong do hata ni amanta on tu inanta mandok : “Ida ma inang, sanga do ahu marpahompu sian anakta di ngolungkon, mauliate ma tadok tu Tuhanta.”.

Marudut muse las nirohana di ngoluna dung sorang muse pahompuna sian anakna di Tigadolok. Holan barita dope sahat tu Tampahan, pintor dijou do inanta nahinan martangiang mandok mauliate tu Tuhanta sian las ni rohana.

Di Tampahan dope amanta on, nunga dipaboa tu inanta goar sibahenonna di pahompuna, i ma RAPLAN. Saut do goar i disahaphon mardongan Tangiangna, asa rap lan mandok rap torop muse pahompuna, di pudian ni ari. Dihalaputi amanta/inanta nahinan ma borhat tu Tigadolok manomu-nomu pahompuna  si RAPLAN. Ditambai anakkonna Gr. J.N. Hutauruk – inanta S. Br. Siahaan ma muse goar JUBIL. I ma muse tamba ni las ni roha ni amanta/ inanta on.

Ringkot adong saotik  sinurathon dison; Dung sorang pahompuna JUBIL RAPLAN on, posa do sahit ni parumaenna Br. Siahaan di Tigadolok, pola humolso angka sisolhot. Alai dipapos amanta nahinan do roha ni sude na humolso i, diboan ma inanta Br. Siahaan dohot pahompuna tu Tampahan laos marubat. Tangkas ditangiangkon tu Tuhanta mardongan elekelek tu Tuhanta mangido hamalumon ni sahit ni Parumaenna, dohot hahipason ni pahompuna on, ai so boi “manarus” sian inana ala sahit i.

Di naung maulum sahit ni parumaenna Br. Siahaan i, di sada bodari dipapungu  ma rap dohot parumaenna Br. Panggabean. Dipasupasu ma pahompuna na dua on, dung i ditangianghon tu Tuhanta asa gabe anak siboan barita na denggan muse di ngoluna.

c.   Pangaradeon tu pudi ni ngoluna

Nang pe naung asing-asing pangalaho ni  amanta on, gumodang holan “ngolu sogot” nama disarihon rohana; Alai disarihon do ngolu ni nanaeng tinggalhononna di portibion.

Di bulan April 1936, dijou amanta on do panurat on sian ulaonna di Mandailing (Penyabungan) asa ro tu Tampahan. Di sada bodari di Tampahan di na pungu marsipanganon bodarina, didokma mandok anakna panurat on dohot tu parumaenna Br. Panggabean songon on :

“Amang Aman Tunggul dohot hamu inang parumaen. Hubahen pe goar ni pahompungkon Tunggul, asa hamu do na tading dapoton ni angka haha-anggim, lae-ibotom naeng tinggal di hutanta Lumban Soit. Naeng adong sian hamu anakhonnami tinggal di huta. Ala ni i do hubahen damang sikola LANDBOUW (Tani) asa botoonmu mangula tano. Pos rohamuna, sai urupan ni haha-anggim, lae-ibotom do hamu di huta on muse. Hansit do nian na di huta, alai ingot damang ma, songon partunggul ni jabu, borat do nian maneannean tarup, urur dohot na asing. Alai disioi tarup i do partunggul i unang busuk…”. Laos ditangianghon ma tu Tuhanta sangkapna i.

Laos di ari 30 April 1936 i ma rap borhat panurat on dohot inanta Br. Panggabean, pahompuna Tunggul, tinaruhon ni amanta/inanta nahinan tu Lumban Soit. Dipapungu ma angka anakna-boruna na di huta tubu ni angka hahana di jabu ni anakna K.K. Josia Hutauruk mambahen boa-boa laos pasahathon anakhonna Kel. Aman Tunggul on.

Ala so sidung dope jabu naung dipungka pajongjonghon di porlak/ tano na jinalona sian anakna K.K. Josia; gabe maisolat di jabu ni K.K. Josia ma keluarga ni anakna on. Dung pe di bulan Agustus 1936 sidung jabu i laos di si ma “Disuruksuruk” amanta/ inanta nahinan, laos paojakhon hami tu jabu na imbaru i. (Alai masurbu do jabu i di taon 1943, toho di Sidikalang panurat on). Na masa on dung monding amanta nahinan di ari 13 Oktober 1937.

Dung manang na piga taonnari pe muse dipajongjong anakhon ni amanta on Gr. J.N. Hutauruk (O. Bontor) – Inanta br. Siahaan jabu na imbaru mangganti na masurbu i, hot di ingananna nuaeng, asa adong parmianan ni inanta nahinan na sanga “Maisolat” di jabu ni anakna ima anakni hahana Raja Isak, i ma Gr. Ampin Hutauruk nahinan.

d.   Nipi ni amanta dipaboa tu inanta nahinan.

Dung di Hutabagasan Lumban Soit keluarga ni anakna panurat on, sai ro do Inanta nahinan mandulo tu Lumban Soit.

Disada ari bulan Agustus 1937, di na ro inanta nahinan tu Lumban Soit, adong do dibaritahon na masa di amanta nahinan. Dipaboa naung lam asing-asing pangalaho ni amanta nahinan. Na somal olo dope mangurupi mangula di porlak, martukang-tukang, ala malo do martukang amanta on jala malo do manjait pangkean. Alai di tingki i ndang hea be dijama manang aha. Dibilut panuratanna i nama jotjotan, jala dibereng inanta nahinan, dimanogotna, di arianna, di bodarina; Di bilut panuratanna i marsiggang amanta nahinan martangiang. Mabiar ninna Inanta nahinan mandonohi, nang  pe sipata nunga tingkina mangan. Nunga dipaboa amanta nahinan nipina didok tu inanta : “Ale inang, nunga ro hureta na tinait ni 8 hoda na uli jala marhabong mangalap ahu laho nangkok tu Banuaginjang”. “Sai siap nama ahu ninna inanta nahinan, ndang hualusi unang marsak”.

e.   Martinading hata tu angka Guru na di Tampahan.

Selasa 6 Oktpber 1937, ro dope inanta nahinan mandulo hami tu Lumban Soit. Dipaboa naung martinading hata amanta nahinan tu angka guru na di godung i huhut manopoti dosana. Di atas ni sada kuburan ni halak Jerman na di godung i, jongjong ninna amanta on martangiang. Holan taringot tu halak na mate modom do ditaringoti tu inanta nahinan nang tu angka guru-guru na di si, jala didok amanta nahinan “Sonangna i na mate modom i”.

Hatop do mulak inanta nahinan tu Tampahan, saborngin sambing do di Lumban Soit. Sai dompak angka hata ni amanta on nama laho rohana.

f.      Harorona tu Lumban Soit mandapothon ujung ni ngoluna.

Ndang toho di huta panurat on, di na ro amanta nahinan tu Huta Bagasan Lumban Soit, i ma di ari Selasa 12 Oktober 1937 arianna. Disuru nama mangalapi panurat on.

Sai di jabu ni hahana (inangna) br. Nababan ina soripada ni hahana/ inangna i. Diapaboa inanta br. Nabanan on do sude angka hata ni amanta on tu ibana, na holan sonang ni halak na “mate modom” do dihatai.

Hira-hira pukul 5 botarina pe asa sahat panurat on, jala toho manggisgisi pekarangan ni jabu i didapot amanta on. Laos rap panurat on dohot amanta on mamiahi angka engsel ni pintu ni jabu dohot jandela, ala sai olo marngensut-ngensut, sogo rohana.

g.   Na masa bodari ni ari 12 Oktober 1937

Pukul 6.00 botari marhobas mangan Pkl. 7.00 (19.00 WIB) disuru panurat on manjou anakna K.K. Josia, pahompuna Raja Ria tubu ni K.K. Josia Hutauruk. Tingki i ma ditaringoti amanta on taringot tu parbagian hauma, tano mahiang, asa tontu dia ma tohapna. Denggan ma i sude dipaujung.

Dipodai ma hami na tolu, asa tongtong marhasadaon, jala masiurupan di tingkina be. Unang adong masa parsalisian ala ni arta dna., naeng sintong masihaholongan sude pinompar ni O. Salisi Raja Musa. Sai tong do holan na “mate modom” disungkuni tu anakna K.K. Josia, molo adong ditanda na mate modom, “Nda tung sonang do” ?, ninna tu hami na tolu.

Hira-hira pkl. 10 borngin disuru ma panurat on mambuat ulosna ulos Batak Sibolang na jinalona ninna sian Simatuana Raja Ihutan Pagarbatu, laos di uloshon ma i. Disuru muse mambuat mantel na hapal, laos didok : “Pasahat ma on tu laem Simamora”. Disuru muse mambuat arloji kantong namarrante perak, didok : “Pasahat on tu laem Simanjuntak.” Salpu i disuru muse panurat on mambuat dompetna sian saku ni bajuna, didok tu panurat on : “Tiop damang ma on, naeng adong pangkeonmu tu na ringkot…”. Parpudi disuru panurat on mambuat Buku Bibel sian tasna. Dung pinasahat Buku Bibel i, didok ma mandok panurat on, toho nunga peak modom anakna K.K. Josia dohot pahompuna Raja Ria di hambirang ni panurat on, didok :”Burju-burju ho tu inang mu, unang marsak bahen hamu, ingkon ihuthononmuna rohana na lambok i. Unang tinggalhon huta on. Burju damang mangguruhon paradatan tu haham on, jala burju damang mar-Minggu. Sangap bahen damang angka haham na di huta on.”

Nunga hira tonga borngin amanta, jala panurat on pe nunga naeng peak modom. Diulahi amanta i ma muse mandok tu panurat on : “Andorang so modom ho, songon na hudok tu parumaen, ingkon sogot do heheanmu ahu manogot, ai sogot do ahu borhat.”., laos dilehon ma pahompuna Tunggul na niabingna saleleng dung sidung mangan bodarina, tu parumaenna Br. Panggabean.

Hundul dope amanta on maruloshon ulos Sibolang na i, unduk manjahai Buku Bibel. Alai anggo panurat on nunga dipapeak modom di hambirangna.

Hira-hira lobi tonga borngin, di na mamungka nokma simalolong ni panurat on, marhosa godang ma amanta on huhut martangiang. Ndang apala tangkas be dibege panurat on hata ni tangiangna i, alai alang-alang tarbege ma Tangiangna i mandok “Ale Amang, di na nok matangku, di si ma alap tondingku…”.

h.   Na masa manogot ni ari 13 Oktober 1937

Pukul 06.00 Manogot na nunga dungo panurat on, jala naeng heheanna ma amanta on marningot  hatana. Alai mabiar panurat on manghehei, ala tung sinok dope ibana modom huhut marungkor (mendengkur). Gabe laho ma jolo panurat on tu hauma pudi ni jabu i padalan aek tu hauma i, ala toho ulaon na manggole.

Di hatiha i manggora ma inanta br. Panggabean sian dapur mandok : “Ai dia do ho amang ni Tunggul, nunga ginjang ari, so dihehei ho amanta i, nunga masak sipanganon, hatop ma hehei….” ninna.

Alai disi ro goragora ni inanta br. Panggabean on, mangangguk ma panurat on  mandok “Nunga mate be damang i, nunga mate be damang i…….. Ai disi ma soluk ro sude pangalaho ni amanta on , hatana, tonana, dohot pangidoanna asa sogot hehean ibana, rungka ma i sude mardongan biar. Marlojong ma panurat on tu jabu, laos diihuthon Inanta br. Panggabean. Ihut muse hahanami Baginda Betuel Hutauruk na toho di hauma i umbege angguk ni panurat on. Niososan ma simanjunjungna betak na marnipi alai ndang mangkuling be. Marroan ma na sian huta, ro ma muse hahanami Gr. Kladius, Pdt. Melanton tu jabu. Didokhon nasida, ingkon boanon tu R. Sakit Tarutung. Alai koras dijua panurat on mandok na so marguna be marningot sude pangalahona dohot tangiangna tu Tuhanta.

i.       Panurat on laho tu Tampahan paboa barita

Angka dongan na umposo, nunga sanga laho tu tombak, ndang adong be suruon. Gabe panurat on sandiri nama borhat tu Tampahan paboahon na masa.

Dung sahat tu Tampahan, toho di dalan simpang laho nangkok tu jabu ni amanta on dope panurat on; Toho manatap Inanta nahinan sian jabu, ditatap ahu na ro, mangangguk ma inanta on mandok : “ Nunga mate amanta i, nunga ro Aman Tunggul mangalap hita…”, ninna. Alai di na sahat ahu tu jabu, pinaboa na so mate amanta i. Holan na marsahit do dipaboa panurat on. Alai ndang be porsea inanta on.

Ala toho di jabu do haha-anggi ni panurat on, i ma Alfred, Iskandar, Viktor, Soantahon, dohot iboto, i ma Tiomasa, Erika; Disuru ma asa marhobas borhat tu Lumban Soit. Pinaboa ma tu angka guru na di godung i. Saut ma borhat dung jolo martangiang di jabu. (Tuani ma adong hepeng na pinasahat ni amanta tu panurat on, ai gabe i nama pinangke tu ongkos-ongkos, ai tar nania do godangna). 

V. MARUJUNG NGOLU NI AMANTA Pdt. JETRO HUTAURUK

Pukul 4 botari, nunga sahat rombongan ni inanta tu Huta Bagasan Lumban Soit. Di tongan dalan nunga pinaboa tu Hula-hula, Tulang na di Pagarbatu.

Songon dia keadaan manogotna, suang songon i dope didapot inanta nahinan. Tutu anggo tangan, simanjojak (pat), nunga manorus, alai anggo gorak biasa dope. Tingki i nunga torop marroan sian huta Lumban Soit, dirimpu naung marujung ngolu ni amanta on. Laos bodarina nunga ro Tulang ni panurat on i ma Gr. Lukas Lumbantobing dohot Kepala Negeri Panggading Lubantobing, sian Pagarbatu.

Hira-hira pukul 7.30 bodari, martangiang ma Tulang Kepala Negeri Raja Panggading, mangido tu Tuhanta, asa diloas Tuhanta jolo marroha (hehe) amanta on. Alai sai pinaima, ndang be dioloi Tuhanta. Diulahi Tulang Guru Lukas Lumbantobing ma muse martangiang laho pasahat tondi ni amanta on tu Tuhanta. Ndang dope sidung Tangiang i, toho ma di pukul 8 bodarina, mansohot ma parhosaon, so ma dohot gorak ni amanta on. Saut ma marujung ngoluna sian tano on, dialap hureta na tinait ni 8 hoda na uli na marhabong tumopot Debata sitompa ibana.

>>>>>>>>>>>>> STOP !!!, Breaking News <<<<<<<<<<<<

“Sudahkah anda ikut berpartisipasi dalam IDAHUTAMI ?, coba telusuri apa yang ada dalam IDAHUTAMI dan mungkin anda menjadi salah satu yang mampu menjadi bagian penting dalam IDAHUTAMI. Horas!”

>>>>>>>>>>> MAULIATE, God Bless You <<<<<<<<<<<

Coba lihat lagi di sini>>> PROFIL POPULER SAAT INI

 Mulak tu bona>>>

2 Responses

  1. Ariston Tobok Parningotan Hutauruk
    Generasi XIII

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: